Ashpërsimi i gjuhës politike nga opozita duket se po tremb institucionet ndërkombëtare në vend.
Ato i druhen frikës për dhunë në protestën e opozitës, mesditën e nesërme. Për këtë arsye, apelojnë që ajo të jetë sa më paqësore.
Përmes një postimi në Twitter misioni i OSBE-së në Shqipëri ka theksuar se në Shqipërinë e vitit 2017 nuk ka vend për dhunë.
“E drejta për t’u mbledhur në mënyrë paqësore është një prej themeleve të demokracisë. Në Shqipërinë e vitit 2017 nuk ka vend për dhunë” – ka shkruar OSBE në Twitter.
Kreu i Partisë Demokratike, Lulzim Basha ka lëshuar në drejtim të kryeministrit Rama, paralajmërime të shpeshta mbi mundësinë e një përplasjeje, e cila sipas tij, mund të dalë jashtë kontrollit nëse rritet pakënaqësia e protestuesve.
Një nga arsyet e tërheqjes nga zgjedhjet për bashkinë e Kavajës e kryeministrit Rama ishte shmangia e dhunës.
Por, ky skenar mund të ndodhë ditën e nesërme kur opozita ka thirrur në një tubim të madh militantët e saj. I gjithë ky marshim sipas kreut të PD-së, Basha është një tregues force për të detyruar kryeministrin Rama që të dorëhiqet dhe më pas të krijohet një qeveri teknike që do të menaxhonte edhe zgjedhjet parlamentare.
Ndërsa institucionet e Bashkimit Evropian i kanë kërkuar që të lërë rrugën dhe të bëhet pjesë e procesit zgjedhor të 18 qershorit.
