Ministri i Jashtëm në Detyrë, Gent Cakaj deklaroi se shtyrja e vendimit për hapjen e negociatave nuk ka të bëjë me performancën e Shqipërisë dhe Maqedonisë së Veriut, por për shkak të divergjencave të brendshme të BE-së.
Në një deklaratë për mediat, Cakaj theksoi se mungesa e konsensusit vjen nga vizionet e ndryshme për të ardhmen e BE-së.
Ndër të tjera, ministri u shpreh se Shqipëria do të vijojë me intensitetin e reformave, pavarësisht shtyrjes së negociatave deri në maj të vitit 2020.
“Shqipëria dhe Maqedonia e Veriut u trajtuan në mënyrë identike, pasi të dy vendet i kanë plotësuar kushtet për të nisur negociatat, por shtyrja e këtij vendimi nuk ka të bëj me performancën e tyre, por me faktorë të brendshëm.
Fqinji ynë i ka ndryshuar emrin për t’i dhënë fund një problematike prej dekadash, por sërish vendimi u shty sepse vendimi nuk kishte lidhje me Maqedoninë. Edhe për Shqipërinë, që jemi një vend që po bëjmë një reformë të thellë në drejtësi. Edhe për Shqipërinë vendimi u shty, pasi procesi nuk ka lidhje me vendet aspirante.
Kjo është shtyrja për të tretën herë radhazi, për një vendim që është shumë i thjeshtë. Kjo shtyrje e vendimmarrjes nuk lidhet me meritat e Shqipërisë, por pasqyron një varg divergjencash brenda BE-së. Shtyrjen e diskutimit të rastit të Shqipërisë dhe Maqedonisë në maj të vitit 2020, nuk duhet përkthyer si dështim i politikave të BE-së. Procesi i zgjerimit të BE-së do të vijojë pas reformimit të brendshëm të BE-së. Shtyrja e këtij procesi nuk do të thotë që duhet të ketë vonesa për plotësimin e 5 reformave kyçe dhe plotësimin e kërkesave të Bundestagut”, deklaroi Cakaj.
