Ministrja e Drejtësisë, Etilda Gjonaj ka sqaruar aktin normativ për lirimin e përkohshëm të rreth 600 të dënuarve për shkak të koronavirusit.
Në mbledhjen online që Rama po zhvillon me ministrat, Gjonaj u shpreh se do të ketë komisione të posaçme që do të shqyrtojnë dokumentet e të dënuarve.
Sipas saj, janë 3 formularë të cilët do të plotësohen nga të dënuarit dhe familjarët e tyre. Ajo tha se ata do të jenë në kontakt të vazhdueshëm me të burgosurit, ndërsa ata nuk do të lejohen të dalin nga shtëpitë e tyre.
“Me hyrjen në fuqi të aktit normativ, drejtori i burgjeve ka nxjerrë udhëzimet për ngritjen e komisioneve që do të shqyrtojnë dokumentet e të dënuarve. Komisioni i çdo IEVP do të jetë i pari që do të shqyrtojë kërkesën dhe dok e kërkuar nga legjislacioni. Janë miratuar 3 formularët, një që plotësohet nga i dënuarit dhe i dyti është deklarata e përgjegjësisë që firmos i dënuari që do të dalë dhe formulari i tretë, është ai që jep çdo familjar duke dhënë pëlqimin që personi i dënuar të rrijë në shtëpi.
Të gjitha IEVP kanë komunikuar me prokuroritë e rretheve dhe policitë për të marrë informacionin e nevojshëm për kriteret ndaluese që përmban akti normativ, nëse kanë rrezikshmërinë për ambientit ku do të jetojnë. Shërbimi i Brendshëm i Kontrollit të Burgjeve i përfshirë në këtë proces për masat që mund të kenë marrë të dënuarit. I gjithë procesi është i rregulluar nëpërmjet akteve. Është ngritur dhe komisioni i posaçëm i ankimeve që do të marrë në shqyrtim çdo vendimmarrje nëse ka ankesa nga persona që nuk iu është miratuar leja.
Numri total i cili është nxjerrë deri tani është 600 por nuk do të thotë se ky është numri final, pasi mund të ulet nëse ata nuk përmbushin kriteret”, tha ministrja Gjonaj.
