Alvin Berisha është bashkuar me familjen e tij, pas pesë vitesh qëndrimi në kampin e ferrit “Al Hol”, në Siri. Pas takimit me motrat dhe babanë e tij, 11-vjeçari ka kërkuar të takohet me gjyshin e tij.
“Më ço te gjyshi”, kanë qenë fjalët e Alvinit, sapo ka takuar të atin, Afrim Berishën. Ky i fundit ka publikuar një video në faqen e tij të “Facebook”, ku tregon edhe momentin e takimit të vogëlushit me gjyshin e tij.
Vogëlushi shqiptar, i cili në dhjetor të 2014 u mor nga nëna e tij, që shkoi në Siri për t’iu bashkuar organizatës terroriste “ISIS”, mbërriti dje në aeroport, ku e priste babai, Afrim Berisha, me dy motrat.
Alvini së bashku me babain dhe motrat, u nisën më tej në shtëpinë e tyre. “Mirë se erdhe kampion”, ishte banderola e varur në hyrje të banesës.
