Mjekët shqiptarë në Itali gjobiten me nga 500 €, një ditë para kthimit në Tiranë

Ekipi i mjekëve dhe infermierëve shqiptarë kanë përfunduar misionin e tyre një mujor në Itali, ku ofruan ndihmën e tyre me situatën e krijuar nga pandemia.

Mirëpo mediat italiane shkruajnë se personeli mjekësor janë gjobitur nga policia deri në 500 euro, një ditë para se të ktheheshin në Shqipëri.

Sipas “Blitz”, ekipi shqiptar ka festuar mbylljen e misionit me birra dhe muzikë në hotel. Kjo ka shtyrë pronarin e hotelit në Breshia, që të njoftojë policinë.

Ndërkohë mësohet se disa prej anëtarëve të ekipit shqiptar janë ankuar te zyrtarët e lartë të Breshias.

“Ne duhet të sqarojmë çfarë ndodhi mbrëmjë dhe kushdo që ka përgjegjësi do të duhet të përgjigjet. Nuk do të komentoj meritat e policisë për ndërhyrje, pasi këta njerëz mbërritën në Itali me urdhër të kryeministrit të tyre për të na ndihmuar në një nga momentet më të errëta. Tani ata do të kthehen në Shqipëri me një gjobë prej 500 eurosh. Ne duam të kuptojmë çfarë ndodhi në hotel mbrëmje dhe nëse ka përgjegjësi të atyre që kanë kryer operacionin, ndaj dhe do të kërkojmë që çështja të diskutohet në Parlament”, ka thënë zyrtari i Komunës së Breshias, në përgjigje të tyre.