Rudina Hajdari: Kuvendi duhet të mbushet me njerëz që kanë shkollimin e duhur

Deputetja Rudina Hajdari sot në foltoren e Kuvendit theksoi se salla duhet që të mbushet me njerëz që kanë shkollimin e duhur.

Gjithashtu ajo i mëshoi faktit se “asnjëherë salla e Kuvendit nuk është drejtuar nga populli shqiptar”.

“Mungon një lloj politike ndryshe në këtë vend. Nuk është vetëm sot kjo problematikë, por është një nga gjërat kryesore që ka dominuar në politikën shqiptare. Asnjëherë kjo sallë nuk është drejtuar nga populli shqiptar.

Ky ka qenë viti më i vështirë për shqiptarët në 20 vitet e fundit. Dhe ne sot jemi kaq egoistë, kaq të pafytyrë. Po kur do vijë ajo ditë që ne t’i drejtohemi popullit dhe t’i themi që kjo sallë do të përdoret për ta. Ne nuk dimë t’i japim ndihmë ashtu siç duhet.

Po hyjmë në një fazë depresioni. Është shumë vështirë të flasim për ekonominë dhe ne nuk kemi ende një paketë.

Një recesion ekonomik po ndjehet çdo ditë, që edhe gjeneratat e ardhshme do ta paguajnë shtrenjtë këtë që po ndodh sot. Kjo sallë duhet të mbushet me ata njerëz që kanë shkollimin e duhur, vizionin e duhur, për ta bërë Shqipërinë ashtu siç e meritojmë”, tha Hajdari.