Ministria e Shëndetësisë ka reaguar pas deklaratave të Partisë Demokratike, e cila e akuzonte se nuk po jep transparencë dhe aktron me masat e marra në pikat kufitare, në lidhje me koronavirusin.
Përmes një postimi në Facebook, zëvendësministrja e Shëndetësisë, Mira Rakacolli i bën thirrje opozitës të mos përhapë panik. Ajo akuzon PD-në se po e përdor këtë situatë për të bërë politikë.
Sipas saj, struktura e karantinës është përcaktuar që në mbledhjen e dytë, pas vendosjes së kontrolleve për koronavirusin dhe plotëson të gjitha standardet. Rakacolli thekson se janë marrë të gjitha masat për përballimin e situatës.
Postimi i plotë:
Një sqarim për qytetarët, në lidhje me situatën më të fundit të Koronavirusit. Komiteti teknik me mjekë dhe ekspertë nga Instituti i Shëndetit Publik, Qendra Spitalore Universitare “Nënë Tereza”, Qendra Kombëtare e Urgjencës Mjekësore, në bashkëpunim edhe me përfaqësues të zyrës së OBSH në Tiranë, në paketën e masave teknike për përballjen me COVID 19, që prej mbledhjes së dytë të tij, ka përcaktuar me vendim të posaçëm strukturën e karantinës. Kjo strukturë përmbush të gjitha standardet e përcaktuara nga OBSH, në përputhje me rregulloren ndërkombëtare të shëndetit. Po sipas këtyre kritereve kjo strukturë vihet në funksion vetëm në bazë të një rregulloreje të miratuar, dhe vetëm në rast se do të jetë e nevojshme, ashtu siç e përkufizon OBSH. Në vijim të shfaqjes së disa rasteve sporadike të përdorimit të situatës me Koronavirusin për qëllime politike, Ministria e Shëndetësisë e konsideron përhapjen e panikut për këto qëllime, si të fundit gjë për të cilën kanë nevojë qytetarët në këto momente. Ministria e Shëndetësisë dhe Mbrojtjes Sociale garanton se Komiteti Teknik ka marrë të gjitha masat, siç është bërë e ditur dhe në komunikimet tona të përditshme, për parandalimin e shfaqjes së virusit, në përputhje me të gjitha rekomandimet që jep OBSH, me ekspertët e të cilës janë pjesë e Task- Forcës së ngritur, Komiteti Teknik është në komunikim dhe konsultim të vazhdueshëm.
