Ambasadori i BE në Tiranë, Luigi Soreca, ka zhvilluar një takim me Drejtorin e Kabinetit në Presidencë, Edmond Panariti. Mendohet se palët kanë diskutuar për saktësimin e detajeve rreth takimit që pritet të ketë Presidentja e Komisionit Europian, Ursula von derl Leyen, me Presidentin e Republikës, Ilir Meta, gjatë vizitës që zyrtarja e lartë nga Brukseli do zhvillojë më 28 shtator në Tiranë.
Kujtojmë se sot presidenti Ilir Meta ndodhet në Korçë, ku dekoroi katër ish të përndjekur politikë. I distancur nga vendimi personal i kreut të PD, Lulzim Basha, për të përjashtuar ish-kryeministrin Sali Berisha nga PD, Meta tha se nuk është detyra e tij si president të merret me këto çështje dhe as dëshiron.
Sakaq, ai ka komentuar shkurtimisht aksionin e ndërmarrë nga Berisha, për të rrëzuar Bashën, me qëllimin që siç ai e quan, rikthimin e sovranitetit në PD. Meta e krahasoi Berishën me verën, për të cilin tha se sa më shumë kohë kalon, aq më tërheqës dhe demokrat bëhet.
“Nuk dëshiroj të merrem me çështje të tilla, sepse nuk është kjo detyra ime, sigurisht që Berisha nuk mund të rri të them; doktori është si vera, sa më i vjetër aq dhe më tërheqës e demokrat bëhet”, tha Meta.
