Një studim i ri në SHBA ka nxjerrë në pah se fëmijët që zotërojnë një telefon inteligjent nën moshën 12 vjeç kanë më shumë gjasa të përballen me depresion, obezitet dhe mungesë gjumi krahasuar me bashkëmoshatarët e tyre që nuk kanë telefon, sipas sciencealert.com.
Studiuesit po përpiqen të kuptojnë se si këto pajisje, të pranishme në jetën e shumë fëmijëve që nga vegjëlia, ndikojnë në shëndetin dhe zhvillimin e tyre.
Sipas ekspertëve nga Spitali i Fëmijëve të Filadelfias, përhapja e telefonave inteligjentë është bërë kaq e shpejtë sa për brezat e rinj nuk ka ekzistuar kurrë një botë pa to.
Prandaj, vendimi për t’i dhënë një fëmije telefon duhet marrë me kujdes të madh, pasi pasojat e tij janë të lidhura ngushtë me mirëqenien fizike dhe mendore të fëmijëve.
Studimi analizoi të dhënat e 10 588 fëmijëv të moshës 12 vjeç, duke marrë parasysh faktorë si demografia dhe statusi socio-ekonomik.
Rezultatet treguan se rreth 6,5% e fëmijëve që kishin një telefon kishin marrë diagnozë depresioni, krahasuar me 4,5% të atyre pa telefon. Kjo diferencë, edhe pse në dukje e vogël, paraqet një ndikim të rëndësishëm statistikor.
Përsa i përket obezitetit, 18% e përdoruesve të telefonit në moshën 12 vjeç ishin obezë, ndërsa tek fëmijët pa smartphone, përqindja ishte 12%.
Kjo tregon një lidhje të qartë mes përdorimit të pajisjeve elektronike dhe shtimit në peshë në këtë grupmoshë.
Problemet me gjumin rezultuan gjithashtu të theksuara. Rreth 47% e fëmijëve që zotëronin një telefon raportonin se flinin më pak se nëntë orë në natë, krahasuar me 31% të bashkëmoshatarëve të tyre që nuk kishin telefon. Mungesa e gjumit lidhet ngushtë me probleme të mëvonshme si vështirësitë e përqendrimit, humor i paqëndrueshëm dhe performancë më e dobët në shkollë.
Studimi zbuloi gjithashtu se fëmijët që morën telefon deri në moshën 13 vjeç kishin më shumë gjasa të raportonin probleme të shëndetit mendor dhe mungesë gjumi gjatë vitit pasues.
Studiuesit theksojnë se, pavarësisht rreziqeve të mundshme, telefonat inteligjentë mund të kenë edhe përfitime të rëndësishme për fëmijët dhe adoleshentët. Ata ndihmojnë në forcimin e lidhjeve sociale, mbështesin mësimin dhe ofrojnë qasje në informacion të rëndësishëm. Për shumë familje, një smartphone shihet gjithashtu si mjet sigurie dhe komunikimi i domosdoshëm.
