Bisedimet e nisura muaj më parë midis Greqisë dhe Shqipërisë vazhdojnë të jenë pjesërisht të fshehta. Ende nuk janë bërë publike pikat në të cilat dy shtetet kanë rënë dakord. Por, çështja më e rëndësishme mbetet marrëveshja për detin.
Në një deklaratë të fundit, ministri i Evropës dhe Punëve të Jashtme Ditmir Bushati tha: “Po shkojmë në një marrëveshje të drejtë në ndarjen e detit.” Ndërsa kryeministri Edi Rama thumboi opozitën: “Jam 100% i sigurt se kur të finalizohen rezultatet, kushdo që akuzon për tradhti nga të dy krahët do të turpërohet nga opinioni publik.”
Por, një deklaratë e Komisionerit Johannes Hahn ku u shpreh,-“Me të gjitha gjasat do të kemi një marrëveshje mes Shqipërisë dhe Greqisë sepse ajo e cila po diskutohet lidhet me një rindërtim të kufijve”, solli reagime të forta. Edhe pse ato u përligjën nga Hahn, duke thënë se ishte keqkuptua dhe nuk bëhej fjalë për ndryshim kufitar. Edhe pse BE e ka bërë të qartë se nuk do të pranohet asnjë shtet që ka dosje të pazgjidhura.
Ndërkohë që firmosja e marrëveshjes u shty përsëri, qytetarët thonë për Tirana Today se do të jetë mëkat nëse preken përsëri kufijtë e Shqipërisë. Dhe i bëjnë thirrje qeverisë shqiptare të mos vendos në dëm të kufijve shqiptarë, në të kundërt i duhet të përballen me ligjin.
“Me këmbime në tavolinë mund të bësh çfarë pazaresh të duash për gjërat personale. Por, për çështjet e kombit dhe popullit nuk ke asnjë të drejtë të bësh tregti. Territori është i shenjtë dhe i përhershëm, ndërsa qeveritë ndryshohen. Për më tepër që është shkelje e ligjit.”
“Edhe nëse është një kërkesë e fshehtë nga Bashkimi Evropian, ne nuk duhet ta pranojmë. Kemi lëshuar boll territor, ndryshe i bie t’ia japim të gjithë vendin tonë.
Jemi në një situatë kur politikanët tanë nuk i kanë quajtur interesat kombëtare të shenjta dhe ne jemi këtu ku jemi. Nëse ata qeveritarë firmosin në dëm të Shqipërisë, duhet të merren masa dhe të dënohen menjëherë.”
Të tjerë shprehen se nuk janë në dijeni të procesit, shtuar kjo edhe prej periudhës së gjatë, me të cilën këto marrëveshje janë mbajtur të fshehta. Por, janë edhe ata qytetarë të cilët janë besimplotë dhe kanë besim të qeveria, duke thënë se Shqipëria do të jetë e sigurt, pasi nuk do t’i merret asnjë vijë bregdetare.
“Nuk na luan njeri, neve jemi me Amerikën e na mbron ajo. Po nuk e bëri Edi Rama qeverinë nuk ka për ta bërë njeri në botë. Shqiptarët të mos kenë frikë, sepse nuk kanë për t’iu marrë asgjë.
“Do vendosen pikat mbi i dhe do të marrim atë që meritojmë, pra do të ketë një ndarje të drejtë midis vendit tonë dhe atij fqinj.” TIRANA TODAY
