Kryedemokrati Basha ka akuzuar qeverinë për mashtrim me pandeminë, ku sipas tij, janë fshehur vdekjet. Basha u shpreh se qeveria ka dështuar me menaxhimin e pandemisë, ndërsa shtoi se janë dhënë shifra të rreme lidhur me vdekjet dhe vaksinimet. Këto deklarata sollën edhe reagimin e Ministres së Shëndetësisë. Manastirliu ka marrë fjalën në Kuvend, për të replikuar me kreun e PD-së.
Basha është çuar fillimisht nga vendi, duke i përsëritur akuzat dhe më pas i është afruar foltores duke i kërkuar kryetares së Parlamentit të zbatojë procedurën. Tejet e revoltuar, Manastirliu tha se opozita e ka kthyer vdekjen në refren, dhe se akuzat e pabaza nuk mund të jenë fakte.
“E keni kthyer vdekjen në refren. Keni 8 muaj që hidhni vallen e vdekjes. Akuzat shterpë nuk mund të jenë fakte, sikurse shifrat nuk mund të jenë opinione. Shqipëria ia ka dalë ndërkombëtarisht të fitojë betejat e vështira. Loja me të vdekurit është një avaz i vjetër i kësaj politike shterpë, pa din e iman. Studioni më shumë për fatalitetet dhe mos fërkoni barkun. Të bashkohemi të gjithë së bashku që këtë betejë ta përballojmë siç duhet”, tha Manastirliu.
Pjesë nga debati:
Lindita Nikolla: I kam dhënë fjalën zonjës Manastirliu
Lulzim Basha: Një sekond ju lutem…
Lindita Nikolla: Ministri ka të drejtë ta marrë fjalën sa herë të dojë, në rastin konkret e merr për replikë
Ogerta Manastirliu: E keni kthyer vdekjen në refren, keni 18 muaj që hidhni vallen e vdekjes. Nuk e di pse këmbëngulni me kaq kënaqësi në vallen e vdekjes. Akuzat shterpë nuk mund të jenë fakte.
Lulzim Basha: Ç’është kjo kështu
Ogerta Manastirliu: Boll ngritët akuza
Lulzim Basha: Kujt po i jep përgjigjet kjo? Çfarë përgjigje po i jep opozitës kjo?
Ogerta Manastirliu: Mos fërkoni barkun kur ka fatalitete, e kur ka një vaksinë të bërë më pak.
