Qytetarët e pa vaksinuar në Shqipëri, shumë shpejt do të penalizohen për mos marrjen e shumë shërbimeve, sikundër ndodh edhe jashtë. Këtë e ka njoftuar sot në Kuvend Ministrja e Shëndetësisë, Ogerta Manastiliu, ku do të vendosin “GreenPass” për të hyrë në lokale dhe në strukturat e shërbimit. “Do ta vëmë GreenPass”në lokale dhe në strukturat e tjera të shërbimit”, tha Manastirliu.
Deputeti i PD-së, Tritan Shehu, gjatë interpelancës së tij me Ministren e Shëndetësisë, deklaroi se në vendin tonë po përdoren vaksina të pasigurta, siç është ajo ruse dhe kineze. Shehu kërkoi që të shpërndahet Komiteti ekzistues i Ekspertëve, pasi sipas deputetit të PD-së, është thjeshtë një instrument në duart e qeverisë.
“Duhet shpërndarë Komiteti ekzistues, pasi është thjeshtë një instrument në duart e qeverisë. Të merren masa reale për mbrojtjen e personelit, përveç vaksinimit. Të vihen në gadishmëri spitalet periferike. Të forcohen reanimacionet.
Të liberalizohen testet e shpejta. Të organizohet ndjekja post COVID, të paraqitet një kalendar i plotë dhe i qartë. Të ndalojë përdorimi i gjithë vaksinave të pacertifikuara. Të realizohet vaksinimi masiv me dozën e tretë. Të vaksinohen të rinjtë dhe fëmijët me konsensusin e prindërve. Unë jam pesimist se ju do t’i bëni. Shenjat nuk janë të mira”, u shpreh Shehu.
