Partia Socialiste është e vendosur për të marrë mandatin e tretë në zgjedhjet e 2021. Kryeministri Edi Rama ka ‘shkundur’ dje deputetët e Partisë Socialiste. Kreu i qeverisë mblodhi në Elbasan grupin parlamentar socialist, ku në fokus të diskutimit ka qenë thirrja e Asamblesë Kombëtare për zgjedhjen e Kryesisë së re, dhe marrja e porosive për nisjen e fushatës elektorale.
Rama ka larguar Vangjush Dakon nga posti i koordinatorit në Durrës. Këtë detyrë shefi i qeverisë do e marrë vetë.
Ditët e fundit kishte zëra se ai do të kandidonte për deputet në Qarkun e Durrësit. Vlen të theksohet fakti se ambasadorja amerikane Yuri Kim, u dërgoi dje një letër krerëve të partive në vend, duke kërkuar që të mos fusin kriminelë në Parlament.
Duket se lëvizjet nuk kanë ndodhur vetëm në PS, por edhe në PD. Kreu i PS-së, Edi Rama do të marrë përsipër drejtimin e PS-së për qarkun e Durrësit.
Nga ana tjetër, lëvizjet kanë filluar edhe në selinë blu. CNA.al ka mësuar se personi që përflitet në korridoret e PD-së, për të drejtuar fushatën e PD-së në Durrës është emri i Bujari Nishanit, i cili është ish-president, dhe kryetar i Këshillit Kombëtar të PD-së.
Bujar Nishani pritet që të jetë kryesues i listës së PD-së në këtë qark.
Ish-kryeministri Berisha do të jetë “asi nën mëngë” i PD-së, i cili pritet të bëjë diferencën.
Ende ka diskutime se në cilin qark do të qëndrojë ish-kryeministri dhe lideri historik i Partisë Demokratike, Sali Berisha, në Tiranë apo në Durrës.
“Megjithatë, ende nuk ka një konfirmim për Berishën, sepse kandidimi apo zona e tij nuk varet nga Lulzim Basha. Por, duke qënë se në Durrës socialistët kanë dërguar Ramën, mund të shkojë edhe Sali Berisha së bashku me Nishanin, që të bashkojnë strukturat e shpartalluara në Durrës dhe të tentojnë të maksimizojnë votën, pasi me listat e hapura dhe me ndarjen territoriale, qarqet që do të bëjnë diferencën do të jenë Tirana, Durrësi, Fieri dhe Elbasani”, shkruan CNA.al.
