Nga Beogradi, kreu i qeverisë Edi Rama theksoi se “Ballkani i Hapur” është i hapur, gjithëpërfshirës dhe i të gjithëve. Ai nënvizoi se nisma për “Ballkanin e Hapur” do të vazhdojë të implementohet, pavarësisht se tre nga vendet e rajonit nuk i janë bashkuar. Kryeministri tha se refuzimi i Kosovës, Malit të Zi dhe Bosnjës vjen “për arsye të mos arsyes”.
“Ballkani i Hapur nuk është për tre vende, është për gjashtë vende, dhe ndryshe nga procesi i Berlinit nuk merret dot peng nga asnjë vend.
Nuk jemi te detyruar që të bëjmë konsensus, sikur jemi një karikaturë e Këshillit Europian. Shqipëria, Serbia dhe Maqedonia e Veriut nuk do të presin që të binden të tjerët. I kam dëgjuar arsyet e Malit të Zi, Kosovës dhe Bosnjës, por më duken “arsye të mos arsyes”.
Ju thatë se kjo duket sikur është për interesat ekonomike të këtyre vende, po sigurisht që për këtë jam unë këtu, për Shqipërinë, për çfarë të vij tjetër?!
Në dhjetor kur ne të bëjmë takimin, dhe kur ti dorëzojmë sipërmarrësve që takuam sot, dhe kur t’i përfshijmë kompanitë që kanë lidhje tregtare në një kanal jeshil, po ju them mos u habisni që kompanitë nga Bosnja, Kosova, do vijnë të përfshihen para se të vijnë qeveritë e tyre.
Mos u çudisni se kjo nuk është tekë, apo vizion haluçinant i imi apo Vuçiç, po kërkesë ulëritëse”, tha kreu i qeverisë shqiptare.
Në muajin shtator, kryeministri i Kosovës, Albin Kurti, deklaroi se nuk janë pro “Open Balkan”.
“Nuk di për çfarë konspiracion po flisni… Procesi i Berlinit është i nevojshëm edhe i mjaftueshëm për rrugëtimin evropian. Ballkani jo vetëm nuk është tre shtete, por nuk është as gjashtë shtete”, u shpreh Kurti.
Kryeministri i Kosovës, Albin Kurti pohoi se dallimi kryesor mes Procesit të Berlinit dhe nismës “Ballkani i Hapur”, është mungesa e Bashkimit Evropian.
“Për raporte normale në Ballkan, nuk duhet të ndryshojë Kosova, por Serbia. Bëjnë gabim ata që ndërtojnë trysni mbi Kosovën. Serbia të ndryshojë Kushtetutën”.
