Pas katër ditësh mjekim spitalor, ish-Prokurorja Publike Speciale, Katica Janeva, rikthehet në paraburgim në burgun hetues “Shkup”. Ishte avokatja e saj, Irena Fërçkovska, ajo e cila konfirmoi lajmin duke mos dhënë asnjë detaj tjetër në lidhje me gjendjen e saj shëndetësore.
“Me siguri do të lëshohet sot në mesditë dhe atëherë do të kem më shumë detaje”, deklaroi Fërçkovska.
Janeva u transferua javën e kaluar në klinikën “Zhan Mitrev” për kontroll kardiologjik internist, si pasojë e tensionit të lartë dhe anksiozitetit të përgjithshëm. Paraprakisht, mbrojtja e Janevës kërkoi që paraburgimi t’i zëvendësohet me arrest shtëpie, por Gjykata e refuzoi këtë kërkesë.
Kujtojmë se ish-prokurorja, Janeva është e akuzuar në aferën “Reket” dhe është duke e vuajtur masën e paraburgimit në burgun hetues “Shkup”.
