Kryeministri Edi Rama ditën e sotme vizitoi familjen e Fatmir Gjanës në Durrës, që është prekur nga tërmeti i 26 nëntorit.
Gjana humbi bashkëshorten, Xhuljetën, e cila kishte vrapuar për të dalë jashtë gjatë tërmetit, por nuk mundi të shpëtonte.
Kreu i qeverisë tha se kur bie tërmet, nuk duhet të dalësh kurrë jashtë, pasi rrezikon më keq.
Ai rikujtoi një tërmet të fortë, që kishte rënë kur ishte i vogël dhe sesi babai i tij, Kristaq Rama, i kishte shpëtuar së bashku me të vëllanë, Olsin, duke i mbajtur te dera.
Më tej, Rama tregoi se ka pasur marrëdhënie shumë të afërt me babanë e tij, ndërsa kujtoi se kur ka marrë vesh lajmin për vdekjen e tij nga Parisi, ka hequr mjekrën dhe vathin.
Biseda:
Rama: Nuk duhet të dalësh jashtë, kur bie tërmet. Ishim të vegjël kur ra një tërmet. Më kujtohet, Kristaqi i shkretë më kapi mua dhe Olsin te dera.
Gjana: Ky ishte shumë i fortë dhe u këputën katet e para. Katër kate ranë si me rënë një kuti.
Rama i drejtohet djalit të Fatmirit: Më hoqe mallin e vathit tim. Kam pas vath edhe unë, e hoqa kur më vdiq babai, isha në Paris, dhe kishim shumë marrëdhënie të afërt, por unë do nisesha të nesërmen se nuk kishte avion dhe kam ndenjur nga stresi nuk e di se sa orë, kam hequr mjekrën pa shkumë fare, hoqa vathin dhe u bëra si njeri normal, se më parë quhesha jo normal dhe erdha për varrimin. Pastaj, ditën e varrimit u bëra ministër, ishte koincidencë, shkruan “balkanweb”.
