Kancelarja gjermane, Angela Merkel,deklaron se qeveria federale ka vendosur për hapjen e negociatave me Shqipërinë dhe Maqedoninë e Veriut.
Gjatë konferencës për shtyp, Merkel tha se tani i takon Bundestagut të vendosë përfundimisht duke theksuar se nuk mund të fliste në lidhje me vendimet që do marrin vendet tjera.
“Nuk mund të flas për vendet e tjera pasi ato vendosin vetë, por së pari mund të them për pozicionin gjerman, i cili lidhet me Bundestagun gjerman. Qeveria ka dhënë një rekomandim pozitiv për të dy vendet me specifikat e veta, si për Maqedoninë e Veriut ashtu dhe për Shqipërinë, por është Bundestagu ai që do të vendosë dhe besoj së shpejti do të kemi një vendim”, u shpreh ajo.
Sa i përket marrëveshjes me Serbinë dhe Kosovën, Merkel u shpreh e pakënaqur nga marrëdhëniet mes tyre ndërsa shtoi se nuk kishte një datë për pranimin e Serbisë në Union.
“Nëse Serbia i plotëson kushtet e saj, atëherë ka ardhur koha të flasim për pranimin,” theksoi ajo.
Sipas saj, ka një përparim të konsiderueshëm në bisedimet mes Serbisë dhe BE-së.
