Duke iu referuar ndryshimeve në aktin normativ të mars 2020, secili person që nuk respekton orën policore, do të ndëshkohet me pezullim patente 1 muaj si dhe masë shtesë gjobë. ‘Report TV’ mëson se vetëm në Tiranë për periudhën mars 2020 deri në mars 2021 janë 160 ankime në gjykatën administrative për patenta të bllokuara në Tiranë me masën 3 vite.
Siç duket, pas lehtësimit të masave anti-Covid, është tërhequr edhe penaliteti 3 vite bllokim patente dhe mjeti për mosrespektim të orës policore.
Një ditë më parë, Komiteti Teknik i Ekspertëve vendosi rishikimin e masave kufizuese, duke u bazuar në uljen e rasteve pozitive si dhe viktimave. Kryetarja e Komitetit Teknik të Ekspertëve, Mira Rakacolli, deklaroi se nga data 1 qershor do të hiqet maska në ambientet e jashtme, por jo të brendshme. Ajo u shpreh se ora policore do të shtyhet me 1 orë duke u vendosur 23:00 deri në orën 06:00. Ndërsa për periudhën e muajit korrik, ora policore do të vendoset në 24:00, ndërsa kufizimi i muzikës dhe klubeve të natës nuk do të ndryshojë.
