Pasi iu ndau detyrat prefektëve dhe Forcave të Armatosura, ku i urdhëroi të shkonin në Durrës, aty ku situata ishte më emergjente, Rama ka mbledhur më tej grupin parlamentar të PS.
Kryeministri Rama tha se të gjithë deputetët, ministrat dhe kryebashkiakët do të ndahen në të gjitha zonat e prekura nga tërmetet, për të zhvilluar komunikime me qytetarët.
Ai deklaroi se banorët në Durrës kanë qëndruar të gjithë në ankth, dhe se sot ata kanë më shumë nevojë se kurrë. Mjaft i prerë në qëndrimin e tij, Rama kërkoi që të realizohet objektivi, se para se të fillojnë reshjet e shiut, të gjithë familjet e rrezikuara të mos jenë në çadra.
“Mbrëmë e keni ndjekur, veçanërisht në Durrës ka pas më shumë ankth, ku një pjesë e konsiderueshme e familjeve qëndruan jashtë banesave. Të gjithë së bashku ne të kushtojmë gjithë pjesën e mbetur të ditës së sotme për kontakte me njerëzit, në çdo zonë ku janë identifikuar pikat.
Duhet të kemi një inventar të dëmeve, duhet t’iu shpjegohet njerëzve se godinat që kanë ndarje të brendshme, janë të garantuara.
Të gjithë bashkë duhet të ndahemi sipas zonave, dhe pjesa tjetër e bashkive, të fokusohemi në pikat kritike, duke u përpjekur të mbulojmë të gjitha shtëpitë dhe për çdo familje të ketë një kontakt sot.
Do e realizojmë objektivin që para fillimit të shiut, asnjë familje të mos jetë në çadra, të gjithë të kthehen nëpër shtëpi. Edhe PS ka dhënë një kontribut, që ka shkuar për të prekurit nga tërmeti në Korçë, dhe një grup kompanish janë përfshirë në këtë proces, edhe nga buxheti i shtetit kemi vendosur një shumë.
Të njëjtë gjë do bëjmë përsëri, çdo bashki do përfshihet me një kontribut sado modest”.
