Nga Anxhela Ferra
I quajtur profesioni më i vjetër në botë, prostitucioni është një nga temat më të diskutuara të shoqërisë. Teksa disa vende e kanë të legalizuar dhe gjithçka kryhet me rregulla, në Shqipëri nuk ndodh kështu. Edhe pse është një punë ilegale, përsëri në vendin tonë, në kryeqytet, në qytete madje dhe në zona ruralë, ka vajza që e ushtrojnë.
Disa nëpër rrugë, të tjera nëpër lokale, hotele, madje tashmë është në rritje edhe fenomeni i punësimit nga rrjetet sociale. Pa iu interesuar se Kodi ynë Penal ka një sërë sanksionesh për punonjëset e seksit. Si dhe për ata individë që lëshojnë ose mbajnë ambiente me qira për ushtrimin e prostitucionit.
Si pasojë një nga debatet më të forta lidhur me këtë çështje, është hapja apo jo e shtëpive publike. Por, duket se pjesa më e madhe e shqiptarëve nuk janë gati për një gjë të tillë, madje edhe të rinjtë. Ata shprehen për Tirana Today se në Shqipëri nuk ekziston ende mentaliteti që prostitucioni të bëhet legal.
“Për mendimin tim, nuk duhet të hapen. Ato nuk e di për çfarë e bëjnë, ndoshta se nuk kanë lekë të hanë bukë. Apo për arsye të tjera. Por, mua nuk më duket gjë e mirë.”
“Unë besoj se nuk duhet të hapen. Nuk është vendi i duhur Shqipëria për të bërë këtë gjë. Unë edhe nëse do të ishin legale, nuk do t’i frekuentoja këto shtëpi publike. Jam më privat si person dhe mendoj se ka gjëra të tjera më interesante.”
“Mua nuk më pëlqen, të paktën në Shqipëri jo. Sepse këtu në Shqipëri mungon mentaliteti, për ta bërë një gjë të tillë.”
“Jo, është shumë e pështirë të hapen këto shtëpi publike. Është jashtë normales dhe jashtë etikës. Gjithsesi, njerëzit duhet t’i kontrollojnë epshet e tyre.”
Teksa për disa mund të duket e çuditshme, gjatë periudhës së Mbretit Zog në Shqipëri prostitucioni ka qenë legal. Madje ekzistonin një sërë shtëpish publike ku vajza shqiptare, por edhe të huaja ushtronin këtë profesion. Në bazë të çmimit, fitimi ndahej në këtë mënyrë: prostituta merrte 40%, pronarja 30% dhe shteti 30%.
Por, edhe pse në atë kohë duket se shoqëria shqiptare ka qenë më e hapur, ose “e detyruar” ta pranojë, sot është shumë e vështirë. Edhe të moshuarit shprehen për Tirana Today se hapja e shtëpive publike do të sillte veç dëme për jetën shoqërore.
“Për moshën time nuk është normale që të mendohet hapja e shtëpive publike. Nuk më duhet mua koha e Zogut. Ata që ishin në krye dhe e drejtonin këtë punë, ishin injorantë. Kur nuk e kontrollon dot Holanda që e ka ‘universitet’ prostitucionin, prisni ta kontrollojë Shqipëria që është në të katërta anët e hapur.”
“Shtëpi publike për të bërë budalliqe? Jo, unë them jo. Sepse nuk është fare mirë. Të shkojnë 100 veta me një gocë dhe pastaj të shkojë djali nuk është normale. Merr sëmundje e pastaj çfarë u pa. Pra, më mirë të jenë të mbyllura. Merr një gocë dhe jeto tamam. Edhe 100 të provosh, e njëjta gjë është.”
“Unë nuk jam dakord që të hapen shtëpitë publike. Sepse më duket diçka monstruoze. Është diçka që nuk i shkon vendit dhe ne si popull nuk e kemi këtë kulturë.”
Të paktë janë ata njerëz të cilët mendojnë se hapja e shtëpive publike do të ishte pozitive për vendin. Por, më së pari do të ishte e sigurt edhe për ato vajza që e ushtrojnë këtë profesion. Pasi në këtë mënyrë do të ishte më e kontrolluar dhe më e sigurt.
“Pse jo, do ishte ndoshta diçka që do t’i bënte mirë vendit. Pasi edhe ato që e ushtrojnë këtë profesion do të ishin më të sigurta.”
“Do të ishte mënyrë më e mirë për këto që e bëjnë në fshehtësi. Sepse do të kishin një vend ku do ta bënin me norma. Do të ishin të kontrolluar, por edhe të mbrojtura. Pasi do të kishin në krah edhe një ligj që do t’i jepte siguri.”
“Mendoj që duhet të hapet sepse në çdo shtet thuajse është legale. Pse të mos ketë edhe në Shqipëri?! Nëse do të bëheshin legale dhe në vendin tonë, edhe mund t’i frekuentoja.”/ TIRANA TODAY
