Sot pritet të mblidhet Komiteti Teknik i Ekspertëve, ku do të merren vendime të reja për uljen e moshës së vaksinimit anti-COVID, që pritet të bëhet deri në 16-vjeç dhe për vaksinimin e fëmijëve +12 që kanë probleme me shëndetin. Gjatë mbledhjes së sotme pritet të diskutohet për detajet e marrjes së dozës së tretë, fillimin e aplikimit tek qytetarët si dhe kriteret e domosdoshme për t’u vaksinuar.
“Komiteti i Ekspertëve ka rekomanduar uljen e fashës së grupmoshës së vaksinimit për adoleshentet plus 16 vjeç. Në diskutim gjithashtu është edhe inokulimi i vaksinës tek fëmijët mbi 12 vjeç me probleme shëndetësore, si dhe marrja e dozës së tretë nga një kategori e veçantë. Të gjitha këto do të diskutohen nga Komiteti Teknik i Ekspertëve, të cilët do të japin një përgjigje lidhur me këto rekomandime”, tha Ministrja e Shëndetësisë Ogerta Manastirliu.
Kujtojmë se këtë javë nisi viti i ri akademik, ku ditën e parë nuk munguan incidentet dhe përplasjet. Në ditët në vijim, situata është shfaqur disi më e qetë, dhe kufizimet për studentët e pavaksinuar janë hequr.
Shumë studentë kanë nxituar të vaksinohen ditët e fundit, por pjesa më e madhe vijon të mos pranojë. Të ndodhur para kësaj situate, stafet akademike janë fokusuar te masat mbrojtëse, si maska e alkooli, ndërkohë që nuk ka privim të të drejtës për t’u arsimuar. Tashmë pedagogët nuk po fokusohen te vaksinimi me detyrim, por te sensibilizimi.
