Ndërkohë që në muajin qershor pritet të jepet vendimi në lidhje me hapjen e negociatave të Shqipërisë me Bashkimin Evropian, situata politike në vend ka hyrë në krizë. Përballë largimit të opozitës nga Parlamenti dhe paralajmërimit për protesta dhe mos bindje civile, është qeveria e cila e ka bërë të qartë se nuk pranon të hyjë në zgjedhje të parakohshme.
Kjo deklaratë u mbështet edhe sot nga delegacioni i Parlamentit Evropian. Kryesuesi i delegacionit të PE, Tunne Kelam u shpreh se “qeveria është legjitime dhe se qeveria e përkohshme do të ‘dëmtonte përqendrimin që duhet të keni (partitë) për hapjen e negociatave”.
Tirana Today pyeti qytetarët se çfarë mendimi kanë ata për këto deklarata dhe nëse sjellja e politikës shqiptare do të ndikojë në negociatat e Qershorit. Një qytetarë dënon qëndrimin e delegacionit të Parlamentit Evropian, duke thënë se kështu i kanë mohuar të drejtën opozitës për tu ankuar për probleme që janë reale për Shqipërinë.
“Dënimin e dha që sot BE-ja, nuk ka dënim më të madh se ky sot. Ata nuk pranojnë e nuk njohin asgjë. Shqiptarët dhe veçanërisht pjesa politike nuk kanë të drejtë as të ankohen. Sepse qenka pragu për zgjedhjet a pranimin në BE. Nuk pranoheshin asnjë nga ato të meta që ekzistojnë këtu dhe që opozita i ngre e ne i kemi pranuar që ekzistojnë.”
Ndryshe mendon një tjetër qytetarë, i cili thotë për Tirana Today se delegacioni nuk mbajti qëndrim të njëanshëm, por ishte objektiv.
“Nuk ka të tilla gjëra apo njëanshmëri Bashkimi Evropian. Ato kanë objektivitet, të thuhet gjëja siç është, qoftë e zezë apo e bardhë. Është e garantuar që në qershor do të hapen negociatat, reforma në drejtësi do të shkojë aty ku duhet, këta do të hyjnë në Parlament se nuk kanë ku të shkojnë edhe Shqipëria do të rregullohet.”
Teksa një pjesë fajësojnë veprimet e opozitës e të tjerë të mazhorancës, përsëri shqiptarët janë pesimist për hapjen e negociatave me BE-në në qershor.
“Më keq seç e kanë bërë, nuk ka ku të shkojë më. Ne duam shumë të hyjmë në negociata, por nuk besoj se kjo do të ndodhë në një të ardhme të afërt.”
“Ky i gjati do të bëjë diçka, por nuk duan këta të tjerët nuk e lënë. A dole prej Parlamentit ti, ik tani nuk ke më punë. Nuk të përzuri njeri, ike vetë. Përplasu aty në sallën e Kuvendit dhe jo të prishësh e djegësh. Bota nuk do t’ia dijë, ato duan veç të na gllabërojnë.”
“Në prag të integrimeve evropiane çdo veprim qoftë i opozitës apo i mazhorancës, nëse nuk është koherent me politikën ndërkombëtare është i gabuar. Kërkesa e popullit është që të integrohemi, por politika e në këtë rast opozita është kundër integrimeve.”
“Për të hyrë në BE janë vetë politikanët që e kanë bllokuar. Më mirë të bëhen zgjedhje të parakohshme dhe të mbyllet ky muhabet, të fitojë ai që zgjedh populli.”/TIRANA TODAY
