Drejtuesi i SPAK-ut, Arben Kraja, u shpreh se Prokuroria speciale ishte në vulgun e hetimeve të “nxehta” që kanë të bëjnë me krimin e organizuar, por edhe korrupsionin e zyrtarëve të lartë. Për këto deklarata, ish-deputeti i PS-së, Spartak Braho tha se SHBA-ja duhet të veprojë, duke iu referuar ambasadores Yuri Kim.
Në një intervistë për emisionin “Frontline”, Braho tha se Kim nuk duhet të bëjë më deklarata, por të veprojë dhe të publikojë emrat e atyre personave që kanë kërcënuar gjyqtarët dhe prokurorët.
Sipas ish-deputetit, kryeministri Rama dhe ish-kryeministri Sali Berisha kanë qenë dy figurat që kanë sulmuar më shumë SPAK-un.
“SPAK në prag të dështimit. Prokurorët e SPAK-ut janë kërcënuar. Kush janë ata që i kanë kërcënuar? Alibi i ka ambasadorja Yuri Kim deklaratat se SPAK-u po kërcënohet. Të veprojë ajo. Nëse nuk përkrahen gjyqtarët dhe prokurorët.
Nëse Sali Berisha apo kushdo qoftë kërcënon SPAK-un, të merret dhe të futet brenda. Sali Berisha ia ka marrë dorën Yuri Kim. Ka kërcënuar Rama SPAK-un sa herë i ka dashur qejfi. Zonja kur të flasë herë tjetër për kërcënime, të sjellë emra në tavolinë. U bëmë Republikë llafesh.
Nëse kërcënon Sali Berisha, ta marrin ta fusin brenda. Deklaratat tregojnë pafuqinë e ambasadores. Ajo i thotë se do të bëjë presion, por nuk ecet më kështu. Nuk ecet më, kemi 30 vjet që vijmë vërdallë. Nuk bëhet Shqipëria pa drejtësi. Vetëm drejtësia e bën këtë vend.
Këtu ankohu sa të duash, këtu të heqin qafe. Gjyqtarët janë të trembur. Sa kohë që nuk po shohim veprime konkrete. Çfarë bëhet me dosjen e inceneratorëve? Këta po i nxjerrin përjashtë fare. I kanë brenda, i nxjerrin jashtë. Është operacion i madh, kompleks të cilin DASH, ambasadorët duhet të veprojnë konkretisht. Deklaratat janë shumë të bukura.
Një ditë më parë, Arben Kraja e pranoi se ka pasur kërcënime dhe presione ndaj trupës gjyqësore dhe prokurorëve, por theksoi se të gjithë janë marrë në mbrojtje ashtu siç e parashikon ligji.
“Prokurorë e gjyqtarë të SPAK-ut kanë çështje të vështira për të trajtuar, qoftë për personazhe të krimit të organizuar. Ka pasur presion, por kanë mbrojtje siç ja parashikon ligji”, tha ai.
