Një moment që po bën xhiron e rrjetit shfaq ish-kryeministrin Berisha kur u propozua që Lulzim Basha të shkarkohet me votim të fshehtë si kryetar. Berisha nuk e ngriti dorën. Teksa Belind Këlliçi pyeti të gjithë se nëse ishin dakord apo jo për të nisur procesin për shkarkim të kryetarit, propozim që kalonte me 15% të anëtarëve, Berisha nuk ngriti dorën lart. Të gjithë delegatët pranë tij u panë me duart lart, si për të treguar se ishin pro votës për shkarkimin e Bashës.
Sakaq, në fjalën e marrë, Berisha shigjetoi kryedemokratin Lulzim Basha se është përkulur para qeverisë së Ramës, pasi mori drejtimin e Partisë Demokratike.
Sipas Berishës, Basha nuk arriti dot që t’i vendoste kryeministrit Rama “kufirin te thana”. “Ai nisi drejtimin e partisë duke u përkulur në kundërshtim me ligjin para regjimit të Edi Ramës. 2 vite pasi dorëzuam pushtetin, Edi Rama i bllokoi çdo projekt të Bashkisë së Tiranës. I bllokoi bulevardin, sistemimin e lumit, vendosjen e tramvajës. Të gjitha këto projekte të mbështetura fuqimisht nga qeveria e Partisë Demokratike. Kryetari ynë nuk lëvizi një gjethe të protestave në Tiranë dhe nuk arriti t’i vendoste Edi Ramës kufirin tek thana”, tha Berisha në Kuvendin e 11 dhjetorit.
