Akuzat e kundër-akuzat janë kthyer në një pjesë të pandshme të përplasjes në distancë ndërmjet Berishës e Bashës. Lideri demokrat Lulzim Basha ka reaguar menjëherë pas thirrjeve të vazhdueshme të ish-kryeministrit Berisha, për protestë në datën 8 janar para selisë blu.
Përmes një postimi në Twitter, Basha shkruan se është hera e parë që një politikan i shpallur “non grata” nga Shtetet e Bashkuara të Amerikës, thërret një protestë kundër partisë së tij. Ai thekson se motivi i ish-kryeministrit Sali Berisha është që Partia Demokratike të kthehet në mbrojtje të tij, por për të, kjo nuk do të ndodh kurrë.
“Hera e parë në historinë e Shqipërisë që një politikan i lartë shpallet i padëshiruar nga SHBA, dhe po hera e parë në Shqipëri që ai thërret një protestë kundër partisë së tij – Partisë Demokratike, me motivin pse ajo nuk kthehet në bunker ku ai mund të ‘strehohet’ për tu mbrojtur”, shkruan Basha në Twitter.
Hera e parë në historinë e Shqipërisë që një politikan i lartë shpallet i padëshiruar nga SHBA,dhe po hera e parë në Shqipëri që ai thërret një protestë kundër partisë së tij – Partisë Demokratike,me motivin pse ajo nuk kthehet në bunker ku ai mund të ‘strehohet’ për tu mbrojtur.
— Lulzim Basha (@lulzimbasha_al) January 4, 2022
Sakaq, akuza në drejtim të ish-kryeministrit Sali Berisha janë hedhur edhe nga Partia Demokratike. Me anë të një reagimi, Partia Demokratike thotë se ish-kryeministri Sali Berisha po përgatitet që të sulmojë selinë blu. PD thekson se kjo parti nuk do të jetë kurrë e hapur për trafikantët e drogës, që shoqërojnë ish-kryeministrin Sali Berisha, gjuha e të cilit ka si qëllim vetëm nxitjen e dhunës. “Partia Demokratike nuk do të jetë kurrë e hapur për trafikantët e drogës që shoqërojnë Sali Berishën, në sulmin që po përgatit kundër Partisë Demokratike për të vendosur hallin e tij mbi të ardhmen e gjithë demokratëve. Çdokush e ka të qartë se gjuha dhe aktet e tij kanë qëllim të nxisin dhunë, si opsionin e vetëm që i ka mbetur. Sali Berisha mund të shoqërohet me trafikant droge të shpallur “non-grata” në Mbretërinë e Bashkuar, pjesë e organizatës kriminale B9”, thuhet në reagimin e Partisë Demokratike.
PD sulmon Berishën
Në deklaratën e Partisë Demokratike thuhet se ish-kryeministri Sali Berisha mund të shoqërohet me trafikante droge të shpallur “non grata”, dhe mund të bëjë edhe biznes me ta, por jo të bëjë biznes me interesat e demokratëve.
“Mund t’i ftojë në shtëpi, familjarët e tij mund të bëjnë edhe biznes me pasuri të paluajtshme me ta në një skemë të pastër pastrimi parash, si dhe mund të ndajnë edhe fitimet nga bizneset me lojërat e fatit, por kurrë nuk kanë për t’u lejuar më të bëjnë biznes me sakrificën e demokratëve. Shumica dërrmuese e anëtarëve të Kryesisë së Partisë, Këshillit Kombëtar dhe 5004 delegatë të Kuvendit Kombëtar, më 18 dhjetor zgjodhën të ardhmen, zgjodhën t’i shërbejnë interesit të demokratëve, zgjodhën t’i shërbejnë vetëm interesit të Shqipërisë”, thuhet në reagim.
