Sekretari i Përgjithshëm i Partisë Demokratike, Gazment Bardhi ka dhënë një prononcim për mediat pas daljes së tij nga Prokuroria, ku ka depozituar sërish një padi penale ndaj ministrit të brendshëm Sandër Lleshaj dhe Policisë së Shtetit.
Bardhi, teksa etiketon ministrin e Brendshëm një “mbetje komunizmi”, thotë se Lleshaj konsideron një ngjarje kriminale protestën e opozitës, ndërsa grabitjen e miliona eurove në aeroportin ndërkombëtar “Nënë Tereza” e quan një incident.
Më tej, Bardhi i bën një apel prokurorëve dhe gjyqtarëve, duke i siguruar ata që nuk do ta kalojnë procesin e vetting-ut për aq kohë sa i shërbejnë qeverisë.
Pjesë nga fjala e Gazment Bardhit:
Kam dhënë pretendimet mbi veprimet e kundraligjshme të punonjësve të Policisë së Shtetit, të cilët më urdhër politik kanë penguar qytetarët të protestojnë. Ministri i Brendshëm protestën e konsideron ngjarje kriminale ne Shqipëri, ndërsa vjedhjen ne aeroport e konsideron incident.
Çdo qytetar që kërkon të drejtën, i shtypet koka me çdo mjet. Apeli im është për prokuroret dhe gjyqtarët, të cilët nuk do ta kalojnë vettingun duke i shërbyer qeverisë. Fundi i prokurorëve dhe gjyqtarëve që i shërbejnë qeverisë është i njëjtë më fundin e kësaj bande kriminale.
Ministri i brendshëm është një mbetje e post komunizmit që e quan të drejtën e qytetarëve si puç kushtetues. Nuk ka dhe nuk do të ketë asnjë ministër të brendshëm, asnjë drejtues policie, prokuror që të trembë qytetarin për të protestuar, vetëm për një mbetje komunizmi protesta është puç kushtetues.
Ju garantoj që policët kanë shkuar në spital vetëm për të bërë filmime me ministrin. Nuk ka patur asnjë akt dhune, asnjë sulm ndaj punonjësve të policisë.
Do të vazhdoj të ushtroj detyrën time si sekretar i përgjithshëm i PD-së. Frika në Shqipëri për të protestuar ka përfunduar me regjimin komunist, thirrja ime shkon për ministrin e brendshëm, e përsëris është një mbetje e komunizmit dhe i them që komunizmi ka përfunduar para 30 vjetësh.
Nuk ka pasur asnjë thirrje në telefonin tim për të kërkuar mbështetje nga ana e policisë. Rama është një fytyrë që shqiptarëve i duhet t’i hiqet qafe sa më parë./ Tirana Today
Denonco ne TT