Nga Anxhela Ferra
Vetëm në një vit e gjysmë në burgjet e Greqisë kanë humbur jetën 11 shtetas shqiptarë që ishin duke vuajtur dënimin penal. Duke çuar kështu në më shumë se 180 vrasje të shqiptarëve në shtetin fqinj. Shifra të rënda, për të cilat gazetari Aulon Kalaja thotë se nuk janë rastësore. Por, fajëson autoritetet greke, se në shumicën e rasteve kanë gisht në ngjarjet. Edhe pse një pjesë e përplasjeve kanë ndodhur mes të burgosurve, Kalaja akuzon gardistët grekë si racistë dhe se nuk bëjnë asgjë për të mbrojtur shqiptarët.
“Numri i shqiptarëve të vrarë në Greqi po rritet në mënyrë progresive. Vetëm gjatë këtij viti kemi pasur vrasje të tjera në burgje, nëpër komisariatet e Greqisë. Shqiptarët e vrarë nga ushtria greke në kufi nuk mund të thuhet që kanë larë hesapet me njëri-tjetrin. Kemi shqiptarë të tjerë të cilët janë vrarë nga gardianët e burgut grek, rasti më i famshëm dhe më tragjik është ai i Ilia Karelit. Numri ka kaluar më shumë se 180 vrasje të shqiptarëve dhe sigurisht që nuk kemi të bëjmë më me një rastësi.
Janë shqiptarët etnia që është vrarë më shumë nëpër burgjet greke dhe komisariatet e policisë, krahasuar kjo me çdo nënshtetësi tjetër. Po theren si pula në ditët me diell dhe në sy të gardianëve të burgut. Të cilët disa prej tyre janë edhe pjesë e Agimit të Artë, kanë idetë halucinante që Greqia duhet të jetë e pastër dhe nuk i duhen emigrantët.
Për grekët këto janë thjeshtë një rutinë e thonë “t’i heqim qafe këto”, a thua se janë qenë. Mundësisht ata të vrasin, nuk të lënë të qash dhe e varrosin në vende që ti e ke të pamundur ta gjesh trupin. Nuk i japin as një varr në Greqi, e për këtë kemi rastin e Pëllumb Marnikollajt.”
Gazetari thotë se autoritetet greke abuzojnë shumë me shqiptarët që gjykohen atje, duke i akuzuar për selektivë në zbatimin e ligjit.
“Përse me shqiptarët?! Sigurisht dihet që ka një lloj tendence racizmi. Për t’iu marr një shembull të fundit. Bëhet fjalë për një shqiptarë çam, i cili është kapur vetëm me 16 kg hashash dhe është dënuar me burgim të përjetshëm në Greqi. Shaban Veizi është nga Konispoli dhe sot 54 vjeç. Është arrestuar në vitin 2004, kanë kaluar 15 vjet dhe ai ende vuan dënimin. I cili nuk është 15 apo 20 vjet, sa mund ta ketë Kodi Penal i Greqisë.
Mund t’iu marr shembuj të tjerë të tillë. Një shqiptar ka shkuar në Gjykatë dhe për të diskutuar qoftë me Prokurorin apo Gjyqtarin, nuk kishte mundësi. Pasi përkthyesja që ka marr përsipër gjyqin e shqiptarit nuk ka ditur shqip. Pra, imagjinoni me çfarë procesesh të montuara kemi të bëjmë, për sa i përket Gjykatave në Greqi.”
Edhe pse numri i të vrarëve në Greqi është shumë i lartë, përsëri autoritetet tona nuk kanë reaguar asnjëherë. Madje as nga Ambasada Shqiptare në Greqi asnjëherë nuk është kërkuar drejtësi për shqiptarët e vrarë padrejtësisht në shtetin helen. Kalaja thotë se funksioni i Ambasadës është të bëjë falsifikime pasaportash dhe jo të bëjë detyrën e vetë.
“Ambasada Shqiptare në Greqi është një vend nepotizmi, aty kanë shërbyer afërt të politikanëve shqiptarë. Ata merren me pasaporta falso, me trafikim pasaportash. Marrin para, qoftë Konsullata në Selanik apo të tjerat në qytetet e tjera. Dhe asnjëherë nuk e kanë ngritur sikur një nga rastet e tilla. Por, edhe politikanët shqiptarë nuk e kanë bërë këtë gjë. Nuk ka pasur asnjë deklaratë, edhe në takimet midis Kotzias dhe Bushatit që janë bërë në kuadër të marrëveshjes Shqipëri-Greqi. Në asnjë rast nuk ka pasur nga ana shqiptare, ngritjen e problemit të vrasjes së shqiptarëve në Greqi.”/ TIRANA TODAY
