Kreu i Shtetit, Ilir Meta, ka dekretuar menjëherë emrat e dy ministrave të rinj. Presidenti nuk ka vonuar veprimet proceduriale, teksa ka emëruar në krye të ministrisë së Brendshme Bledi Çuçin dhe ministren e re të Bujqësisë, Milva Ekonomi.
Sikundër paralajmëroi një ditë më parë në konferencë me presidenten e Kosovës, Meta ka dekretuar pa vonesa emrat e dy ministrave të rinj të kabinetit qeveritar.
Bëhet fjalë për ministrin Bledi Çuçi, i cili u propozua nga kreu i qeverisë për të marrë postin e Ministrit të Brendshëm, pas dorëheqjes së Sandër Lleshajt.
Si edhe Milva Ekonomi, e cila do të marrë në postin e ministres së Bujqësisë, në vend të Bledi Çuçit.
Gjithashtu me propozim të kryeministrit, presidenti Ilir Meta ka dekretuar shkarkimin nga detyra të Sandër Lleshajt, nga posti i ministrit të Brendshëm.
