Seanca parlamentare ka nisur me një interpelancë me ministrin e Shtetit per Rindërtimin Arben Ahmetajn, kërkuar nga deputeti Halit Valteri. Ky i fundit akuzoi ministrin se asnjë projekt i rindërtimit, nuk është bërë transparent. Ai tha se me mijëra familje nuk ka marrë asnjë mbështetje, ndonëse po bëhet një vit nga tërmeti. Në vazhdën e akuzave, Valteri shtoi se qeveria nuk ka bërë transparent asnjë projekt rindërtimi, por ende kemi projekte 3D.
“Një vit më parë, Shqipëria përjetoi sinjalin e parë të një vale sizmike shkatërrimtare. Ky makth ishte shkëndija e parë e asaj që do të vinte më pas. Bilanci i tërmetit të 26 nëntorit rezultoi katastrofik.
Në vend që ky të shërbente si një moment që të na bashkonte, konstatohet me keqardhje se mijëra familje edhe pse po bëhen një vit, nuk ka marrë asnjë mbështetje.
Nuk dihet edhe sa do të vazhdojë. Mungon mbështetja nga kryeministri dhe janë lënë në mëshirë të fatit nga shteti. Qeveria nuk ka bërë transparent asnjë projekt rindërtimi, thjesht kemi projekte 3D. Zoti ministër, shqiptarët presin përgjigje nga ju.
Ne sot kemi punime me hapin e breshkës. Sa banorë kanë përfituar fondin e rindërtimit? Vende të ndryshme u solidarizuan me Shqipërinë, shqiptarët duan të dinë se a ka fajtorë për 51 viktimat e tërmetit. Jepini përgjigje, e keni detyrim moral”.
