Ish-ministrja e Jashtme e Greqisë, Dora Bakojanis, tha gjatë tryezës me kryeministrin Rama se marrëveshja e detit e firmosur në vitin 2009 u anulua për shkak të interesave dhe ndërhyrjes së palëve të treta. Gjatë forumit të organizuar nga “The Ekonomist”, Bakojanis deklaroi se marrëveshja e detit të vitit 2009, u bllokua pas ndërhyrjes së Turqisë.
Ajo pohoi se mbetet me shpresë, që presidenti Erdogan do bëj të gjitha përpjekjet e nevojshme që të mos përshkallëzojë tensionet dhe të ndryshojë retorikën. Po kështu i ka përcjellë edhe një thirrje, duke ia bërë të qartë se kjo nuk është një mënyrë e suksesshme për të bërë politikë, dhe se zgjidhja e vetme mbetet dialogu.
“Jam unë ajo që kam nënshkruar këtë marrëveshje, u mërzita shumë kur mora vesh vendimin e Gjykatës Kushtetuese. Me vjen keq që pas kaq vitesh, nuk kemi një marrëveshje mes dy vendeve. Për të qenë e sinqertë, që ndërhyrjet e palëve të treta në këtë marrëveshje ka qenë e madhe.
Të gjithë e dimë që Turqia nuk e ka dashur këtë marrëveshje. Unë njihem në Greqi si një nga mbështetësit e dialogut mes Greqisë dhe Turqisë.
Shpresoj që Presidenti Erdogan do bëj të gjitha përpjekjet e nevojshme që të mos përshkallëzojë tensionet dhe të ndryshojë retorikën. Unë e njoh prej vitesh dhe ai duhet të kuptojë se kjo nuk është një mënyrë e suksesshme për të bërë politike. Duhet ti kthehemi tryezës së dialogut”.
