Dosja “184” e cila përmban 10 përgjime telefonike të realizuara nga prokuroria shqiptare lidhur me zgjedhjet vendore në Dibër do të kalojë në dorë të SPAK-ut.
Ishte gazeta gjermane “Bild” ajo që publikoi përgjimet ku dëgjohen politikanë socialistë, përfshirë dhe kryeministrin Edi Rama, ku diskutojnë për rezultatin e votimeve. Në përgjimet dëgjohen ish-ministri i Brendshëm, Saimir Tahiri, ish-ministri i Energjisë Damian Gjiknuri si dhe deputetë socialistë, që bisedojnë me policë, biznesmenë dhe persona të dyshuar për veprimtari të paligjshme në krahinën e Dibrës.
Ata urojnë njëri tjetrin për maksimalizimin e fitores së zgjedhjeve me presione dhe forma të ndryshme. Atyre u premtohet se do të promovohen në karrierë, sepse ndihmuan fuqishëm fitoren e thellë të PS-së.
