Kryeministri i dorëhequr i Kosovës, Ramush Haradinaj, ka deklaruar se deputetët e partisë së tij AAK, do të votojnë për shpërndarjen e Kuvendit në seancën e jashtëzakonshme, më 22 gusht.
Sipas tij, nëse një subjekt politik i shmanget zgjedhjeve dhe tenton të krijojë qeveri teknike me kryeministër konsensual, do jetë diçka shumë e dëmshme për vendin.
Në një intervistë për RTV21, Haradinaj theksoi se AAK-ja nuk synon formimin e ndonjë koalicioni të madh parazgjedhor teksa përjashtoi mundësinë e bashkëpunimit me LDK-në, LVV-në dhe PDK-në.
“Nuk synojmë një koalicion të madh si rasti me PDK, LDK, e VV por mbesim të hapur me disa parti partnere si rasti i Nismës, PSD-së dhe AKR-së. Unë e kam pasur për nder t’i shërbej vendit së bashku me PDK-, AKR-në dhe Nismën. E kemi vendosur që më tutje t’iu ofrohemi qytetarëve të vetëm dhe jo më si PAN”, tha Haradinaj.
I pyetur më tej nëse do t’i kërkonte partia e Fatmir Limajt postin e kryeministrit për futje në zgjedhje, ai ka thënë se AAK akoma nuk ka pranuar një propozim të tillë.
