Nënkryetari i LSI-së, Petrit Vasili ka folur rreth datë së zgjedhjeve që po afrojnë, duke u shprehur se kryeministri Rama po përpiqet ta çojë vendin në një përplasje civile.
I ftuar në studion e News 24, Vasili foli edhe për takimin që zhvilloi gjatë ditës së sotme me presidentin Meta, ku kanë folur për situatën e tensionuar në vend.
“Presidenti kryesisht ishte ai që na tha shqetësimet, atë që mendoi të ndante me ne në përmbushje të përgjegjësive Kushtetuese që ai ka. Tërhoqi fort vëmendjen në lidhje me çdo sjellje dhe qëndrim. Ishte shumë i qartë: E ardhmja e vendit është kryesorja”,- u shpreh Vasili.
Ai foli edhe për takimin me Bashën, ku u shpreh se kishin folur për mënyrat se si do të organizohet opozita në datën 30 qershor dhe pas saj.
“Mënyrën e qartë të sjelljes dhe veprimeve për mënyrën e organizmit të aksionit opozitar, jo vetëm në datën 30 por edhe në ditët që vijojmë”,- pohoi ai.
Sa i përket mundësisë së një proteste më datë 30 qershor Vasili u shpreh se: “Zgjedhje nuk kanë shqiptarët në atë datë, por vetëm Edi Rama”.