Përqeshet shpesh me ironi si “shkrimi i këmbës së pulës”. E megjithatë, shkrimi i keq i mjekëve është një çështje serioze, që vret çdo vit qindra njerëz. Sipas përllogaritjeve, vetëm në SHBA vdesin çdo vit më shumë se 7.000 njerëz, dhe pësojnë dëme shëndetësore mbi 1.5 milionë të tjerë. Kjo shifër mendohet se shkon në qindra mijëra në mbarë botën, edhe pse për këtë nuk ka statistika të plota.
Për këtë arsye, qeveria amerikane jep çdo vit mbi qindra milionë dollarë, vetëm për projektin e recetave elektronike. Në Shqipëri, ky sistem ka hyrë zyrtarisht në zbatim në janar të vitit 2017, kryesisht për barnat e rimbursueshme. Por eficenca e tij lë për të dëshiruar. Shumë herë të sëmurët kronikë kthehen në shtëpi pa ilaçet e tyre të domosdoshme, për shkak të bllokimit të sistemit.
Po pse mjekët kanë përgjithësisht një shkrim kaq të palexueshëm? Ekspertët, thonë se kjo është kryesisht pasojë e mbingarkesës në punë. Sipas tyre, nëse një mjek shkruan me dorë për 10-12 orë, muskujt e vegjël të dorës nisin të mbingarkohen, dhe më pas të mpihen. Kjo e shndërron një fjalë apo një fjali, në një grumbull shkarravinash.
