Koronavirusi po ndëshkon rëndë Italinë, teksa po shënon pothuajse çdo ditë më shumë se 400 viktima.
Kreu i Mbrojtjes Civile, Borrelli njoftoi se numri i viktimave në 24 orët e fundit ka shkuar në 427. Gjatë fjalës së tij në konferencën për shtyp, ai sqaroi se numri total i viktimave ka arritur në 3,405.
Ndërkohë më shumë se 40 mijë persona janë prekur nga koronavirusi në Itali. Autoritetet italiane i bëjnë apel të gjithë mjekëve dhe infermierëve që kanë dalë në pension gjatë dy viteve të fundit, si dhe atyre të punësuar në struktura private që të vendosen në dispozicion në këto ditë të vështira.
Ekipet kineze të ardhura në ndihmë të popullit italian theksuan se shumë gjëra nuk po funksiononin siç duhej në Itali në luftën ndaj COVID-19.
“Ju me sa duket akoma nuk e keni kuptuar me çfarë keni të bëni. Ne shohim që në Milano ka akoma qytetarë që lëvizin rrugëve, është e pakuptueshme se përse ka akoma metro që punojnë. Nuk shikoj njerëz të mbajnë maska”, tha njëri nga mjekët kinezë.
Evropa është kthyer tashmë në epiqendrën e koronavirusit në botë, por me këto shifra shumë shpejt mund të cilësohet vetëm shteti i Italisë si kryepiqendra e këtij virusi.
Sipas të dhënave të publikuara nga Worldometer, Italia shënon tashmë numrin më të madh të viktimave në botë nga koronavirusi, duke ia kaluar kështu edhe Kinës.
