Në aktivitetin e zhvilluar në bazën ajrore në Farkë, lidhur me menaxhimin e situatës së zjarreve në vend, Rama ashpërsoi tonet sa i përket zjarrvënësve duke theksuar se duhet të kalben në burg. Ai kërkoi nga drejtësia për të dhënë vendimet e duhura.
“Më vjen mirë që Policia e Shtetit ka arritur të çojë prapa hekurave një numër jo të vogël barbarësh, që nuk meritojnë të jenë të lirë mes qytetarëve të lirë të këtij vendi, meritojnë të kalben prapa hekurave.
Shpresoj që gjykatat të japin vendimet e duhura, dhe shpresoj që gjykatësit të jenë në lartësitë e dhimbjes për kaq shumë vlera natyrore të dëmtuara dhe aq shumë pemë, burime jete të shkatërruara”.
Kryeministri ka shprehur falenderimet për ambasadorët, veçanërisht ambasadoren e SHBA në Tiranë Yuri Kim dhe ambasadorin e BE Luigi Soreca, për të cilët tha se kur kemi nevojë janë qytetarë; jo ambasadorë.
“Dua të falenderoj ambasadorin e BE dhe të SHBA. S’është falenderim formal dhe as diplomatik. Sot dua që edhe Luigi dhe Yuri që nuk është e pranishme, por është e pranishme përmes zv.ambasadorit i cili është i vetmi që nuk përdor kufje nga të huajt se di edhe shqip. Dhe na kupton edhe kur ne mendojmë se flasim një gjuhë që nuk e kupton. Të gjithë kanë qenë të vëmendshëm dhe të interesuar për të marrë vesh se si shkoi dita, apo çfarë do të bëjmë sot. Soreca e Kim janë qytetarë kur kemi nevojë, jo ambasadorë. Prania e Holandës dhe Republikës Çeke, dua ti falenderoj për ndihmën që dhanë duke vënë në dispozicion të operacioneve për fikjen e vatrave”, tha Rama.
