Paraditen e sotme, flakët e zjarrit kanë rënë në katin e parë të spitalit Covid 3 në QSUT. Bëhet fjalë për një rezistencë ngrohjeje në zyrat e administratës së këtij spitali. Zjarrfikësit kanë vënë nën kontroll situatën. “Më datë 27.11.2021, te spitali “Covid 3″ ka rënë zjarr në një nga zyrat e administratës, ku ka vetëm dëme materiale. Shërbimet zjarrfikëse kanë bërë të mundur fikjen e zjarrit. Grupi hetimor është në vendngjarje, dhe po punon për sqarimin e rrethanave të rënies së zjarrit”, njofton policia.
Ministrja e Shëndetësisë, Ogerta Manastirliu, ka mbërritur për inspektim në QSUT, pasi spitali Covid 3 u përfshi nga flakët. Ministrja u shpreh se në këtë spital janë 70 pacintë, por zjarri nuk ka rënë në pavionin ku janë të shtruarit.
“Këtu janë tre pavione që ofrohet shërbim ndaj pacientëve me Covid. Dua të siguroj që janë të gjithë shendosh e mirë. Incidenti ndodhi jo në zonat e pavionëve. Ashtu sikur mund të shquhet, është një incident që ka ndodhur në zonën e gjelbër, ku janë shërbimet mbështetëse. Ky incident menjëherë sapo është evidentuar nga strukturat mbështesë, është reaguar përmes bombolave fikse.
Janë lajmëruar strukturat përgjegjëse, të cilat po hetojnë për shkakun e incidentit. Ajo ç’ka është me rëndësi është se pacientët, stafi mjekësor janë shumë mirë. S’ka asgjë për t’u shqetësuar. Incidenti ka ndodhur në këtë zonë të strukturës së ish-Kirurgjive, ku nuk ofrohet shërbim. Janë mbi 70 pacientë në Covid 3. Nuk janë prekur nga ky incident asnjë prej tre pavionëve. Situata është në kontroll”, tha ministrja.
Po a përjashtohet pista e zjarrvënies së qëllimshme?
“Ka disa pista që po hetohen. Po vlerësohen të gjitha”, tha ministrja.
