Kryetari i Këshillit Kombëtar të Nismës Socialdemokrate, Jakup Krasniqi, në një intervistë të zhvilluar së fundmi është shprehur se, Ramush Haradinaj është nxituar kur ka dhënë dorëheqjen.
“Unë mendoj që është një ngutje e kryeministrit Haradinaj, tani në detyrë. Duhet të bëhet një dallim mes qeverisë së shkarkuar me mocion dhe një qeverie në dorëheqje.
Sipas përvojës që e kemi pasur, ndoshta vetë nga Ramush Haradinaj, kur ka shkuar në Tribunalin e Hagës, pati dhënë dorëheqje, që ishte e arsyeshme. E menjëherë pas saj vendi nuk ka shkuar në zgjedhje”, deklaroi ai për T7.
Më tej, Krasniqi u shpreh se qeveria këtë radhë nuk i ka numrat në Kuvend që ta mbajë pushtetin, duke nënvizuar se nuk preferon që vendi të shkojë në zgjedhje.
“Dorëheqja e kryeministrit zakonisht nuk e dërgon vendin në zgjedhje, po kësaj radhe për shkak të numrave të ngushtë, realisht dorëheqja e kryeministrit e ka shkaktuar këtë shkuarjen në zgjedhje. Nëse do të ishin numrat për një kandidat tjetër qoftë nga AAK-ja apo PDK-ja ose Nisma, që të ishte një kandidat tjetër e vendi të mos shkojë në zgjedhje, për mua do të ishte normale”, tha Krasniqi.
