Wuhan, aty ku koronavirusi shpërtheu për herë të parë, duket se është “shëruar” plotësisht nga koronavirusi.
Autoritetet zyrtare bëjnë me dije se të gjithë personat që u prekën nga virusi, janë liruar nga spitali.
“Sipas informacioneve të fundit, numri i rasteve të reja me koronavirus në Wuhan (Kinë), është zero, falë përpjekjeve të stafit mjekësor”, tha zëdhënësi i Komisionit Kombëtar të Shëndetit, Mi Feng, gjatë një konference për media.
Qyteti i Wuhan-it kishte raportuar për 46,452 raste me koronavirus, apo 56 për qind të rasteve në nivel vendi. Ky qytet, po ashtu ka raportuar për 3,869 viktima nga COVID-19.
Sipas të dhënave të fundit të publikuara nga Universiteti Johns Hopkins, 2,8 milion persona në mbarë botën janë infektuar me sëmundjen COVID-19 dhe mbi 200 mijë njerëz kanë vdekur.
