Shqipëria voton ditën e sotme për zgjedhjet lokale ku opozita i ka bojkotuar dhe presidenti Ilir Meta pasi anuloi 30 qershorin ka vendosur që zgjedhjet të mbahen më 13 tetor. Qeveria nuk e ka njohur dekretin e ri të presidentit dhe ditën e sotme në të gjithë Shqipërinë po mbahen zgjedhjet të shoqëruara me tensione dhe protesta.
Në qendrën e votimit pranë shkollës “Vasil Shanto” në Tiranë janë mbledhur një numër mbështetësish të opozitës të cilët janë duke protestuar. Ata kërkojnë që zgjedhjet të mos zhvillohen dhe mes brohorimave kanë inskenuar edhe një votim jashtë qendrës së votimit.
Gazetarja në terren e Tirana Today ka siguruar momentin e “votimit” të protestuesve, i cili është shoqëruar me thirrjen “Parti Enver jemi gati kurdoherë”.
Më pas protestuesit e PD kanë vazhduar me procesin e numërimit të votave ku kanë ironizuar duke përmendur emrat e socialistëve si “Shoku Erion”, Damian Gjiknuri, Partia e Punës, Skënder Gjinushi. /TIRANA TODAY
