Duket se gjakrat nuk janë qetësuar mes Dritan Lelit dhe Edi Ramës, ndërsa vijon përplasja në distancë mes tyre. Gjithçka mori drejtim para zgjedhjeve të 25 prillit, ku pati pakënaqësi mes kryeministrit Rama dhe kryebashkiakut Leli, pasi ky i fundit nuk pranoi të ishte pjesë e listave të kandidatëve për deputet në qarkun e Vlorës.
Rama nuk e la me kaq. Pas këtij vendimi, Leli u përjashtua nga Partia Socialiste, edhe pse ai do e përfundojë mandatin e kryebashkiakut deri në korrik të vitit 2023.
45 anëtarë të Këshillit Bashkiak të Vlorës kërkojnë një mbledhje urgjente jashtë radhe, për t’u përballur me kryebashkiakun Dritan Leli, lidhur me shqetësimet e vlonjatëve për gjendjen e shërbimeve vendore. Ata e cilësojnë si situatë alarmante gjendjen e shërbimeve bazike të pastrimit, mirëmbajtjes, ndriçimit dhe me trajtimin e ankesave dhe të problemeve të qytetarëve.
Çfarë ndodhi mes Ramës e Lelit?
Dritan Leli nuk pranoi që të hiqte dorë nga mandati si kryetar Bashkie, për tu angazhuar në fushatë si kandidat për deputet. Duke marrë shkas nga ky akt, Rama i dërgoi letër Asamblesë së PS në Vlorë, duke shkruar që të mos e pranonin Lelin në fushatë. Pasi Leli refuzoi dorëheqjen, kryesocialisti i dërgoi një mesazh në celular ku shkruhej: “Zhduku nga Bashkia, mos të të shoh më!”. Ky ultimatum nuk mori një përgjigje nga Leli, i cili zgjodhi të fikte telefonin, dhe të mos i përgjigjej Ramës.
