Massimo Ferro, 54 vjeç, sipërmarrës nga Camposampiero, ndërroi jetë më 22 dhjetor në Shqipëri, disa ditë pas një ndërhyrjeje kirurgjikale për reduktimin e stomakut në një klinikë private në Tiranë.
Rasti ka hapur një hetim penal në Itali, ku prokuroria e Padovës ka regjistruar si të dyshuar një kirurg dhe një dietologe nga Lombardia, raporton Corriere della Sera.
Sipas mediave italiane, Ferro kishte shkuar fillimisht në një klinikë private në Milano, e cila i kishte propozuar operacionin e njohur si sleeve gastrectomy në një strukturë “partnere” në Tiranë, me një kosto dukshëm më të ulët se në Itali. Ndërhyrja u krye më 18 dhjetor, pas një përgatitjeje minimale mjekësore, ndërsa analizat paraoperatore u zhvilluan vetëm një ditë para operacionit në Shqipëri.
Familjarët pretendojnë se nuk janë respektuar protokollet dhe udhëzimet ndërkombëtare për kirurgjinë e obezitetit, duke përfshirë mungesën e një vlerësimi multidisiplinar dhe të një periudhe përgatitore dietike.
Pas operacionit, gjendja shëndetësore e Ferros u përkeqësua gradualisht, me temperaturë të lartë, vështirësi në frymëmarrje dhe çrregullime metabolike, deri sa pësoi arrest kardiak.
Autopsia mbi trupin e 54-vjeçarit pritet të kryhet në Padovë, ndërsa familjarët kërkojnë zbardhjen e plotë të rrethanave të vdekjes.
“Duam vetëm të dimë pse Massimo nuk u kthye më në shtëpi,” deklaruan bashkëshortja dhe fëmijët e tij.
