Nga Klodian Tomorri
Për ata që bëjnë çudi me faktin se pse Shqipëria nuk ka asnjë rast koronavirusi të konfirmuar ka dhe një arsye shumë të thjeshtë. Shqipëria ka bërë vetëm 30 teste gjithsej. Britania bëri 10 mijë teste për të gjetur 12 pacientë të infektuar. Ndaj në vend të ekzaltimit bosh, Ministria e Shëndetësisë dhe ISHP do duhej të informonin qytetarët sa më poshtë:
1-Sa kite ka aktualisht të disponueshme Shqipëria për të kryer testin e koronavirusit? Sa të tjera janë porositur?
Po vuan SHBA nga mungesa e kiteve për koronavirusin. Këtu s’flet askush.
2-Sa respiratorë ka gjithsej shërbimi ynë spitalor duke përfshirë dhe spitalet private? Ça masash ka marrë qeveria për të rritur numrin e respiratorëve gjatë kësaj kohe?
Një pjesë e madhe e pacientëve në rast epidemish vdesin sepse mungojnë pajisjet për t’i trajtuar njëkohësisht për shkak te fluksit. Ndaj Hubei e kishte vdekshmërinë 6 herë më të lartë se pjesa tjetër e Kinës.
3-Sa pacientë të infektuar mund të përballojë njëkohësisht sistemi ynë shëndetësor? Ça masash ka marrë qeveria për të rritur kapacitetet e spitaleve për t’u përballur me epideminë?
Fluksi i pacientëve me koronavirus rrëzoi spitalet e Lombardisë si domino. Dhe sistemi shëndetësor italian është një nga më të mirët në botë.
4-Sa maska dhe veshje mbrojtëse për mjekët kanë aktualisht spitalet shqiptare? Sa janë porositur shtesë gjatë kësaj kohe?
Mbroni mjekët. Se ata janë heronjtë që do të përballen me virusin, jo zyrtarët që dalin në televizor dhe nuk thonë asgjë, përveçse bëjnë propagandë me shëndetin publik.
