Policia italiane ka goditur një grup kriminal të cilët akuzohen për grabitje të banesave.
Në pranga kanë rënë 15 persona: shtatë shqiptarë, dy egjiptianë, dhe gjashtë italianë. Operacioni për arrestimin e tyre u zhvillua në orët e para të mëngjesit të sotëm. Hetimet për këtë operacion kanë nisur që në 18 maj të vitit 2018.
Në zonën e Teneza di Paderno Dugnano janë identifikuar dy grupe të cilat udhëhiqeshin nga shqiptarët. Sipas mediave italiane, ata riciklonin sendet e çmuara të vjedhura në shtëpi të ndryshme, duke i shitur në tre biznese të shitjes së bizhuterive.
Ari i vjedhur në formën e bizhuterive shkrihej, duke krijuar shufrat e arit të cilat më pas ishin të destinuara për tregti financiare.
Policia ka sekuestruar sasi të mëdha ari dhe sende të çmuara, të ardhura nga vjedhjet, makina të shpejta të mbajtura të fshehura në garazhe dhe gati për kryerjen e krimeve grabitqare, si dhe para cash, të destinuara për jashtë vendit, në veçanti në Shqipëri.
Hetimi gjithashtu bëri të mundur identifikimin e bizneseve përmes të cilave kriminelët siguruan pastrimin e të ardhurave të paligjshme dhe korrierët (drejtuesit e autobusëve), të përdorur për transferimin e parave dhe mallrave jashtë vendit.
