Iniciativa “Ballkani i Hapur” është vazhdimësi e “mini-Shengenit” ballkanik, që Kosova e ka kundërshtuar edhe më parë. Iniciativën për “Open Balkan” e përkrahin Shqipëria, Serbia dhe Maqedonia e Veriut. Kryeministri i Kosovës, Albin Kurti, ka bërë me dije se pavarësisht se shteti i Kosovës është për marrëdhënie të mira me fqinjët, këtë nuk mund ta kompensoje me shtetësi e as me territor Serbinë për humbjet si shtet që ja ka shkaktuar këtu e dy dekada më parë regjimi i Millosheviçit.
Ai ka thënë se mosnjohja e pavarësisë së Kosovës dhe mosnjohja e krimeve të Serbisë, nuk janë dy gjëra të ndryshme. Sa i takon lëshimeve dhe kompromiseve që mund të bëhen në lidhje me Serbinë në procesin e dialogut, Kurti ka deklaruar se qeveritë e mëparshme kanë bërë kompromise, dhe njohja e Kosovës nuk ka ardhur. Sipas tij, paqe të qëndrueshme dhe siguri afatgjatë në rajon do të ketë vetëm kur Serbia të ndryshojë Kushtetutën dhe të heqë dorë nga Kosova.
Presidentja e Kosovës, Vjosa Osmani, ka dhënë arsyet pse refuzojnë iniciativën e “Open Balkans”, e njohur si iniciativa e Novi Sadit, për shkak se Serbia vazhdon të mohojë ekzistencën e Kosovës si shtet. Osmani flet për Iniciativa të tjera rajonale, të cilat na shtyjnë pozitivisht drejt Bashkimit Evropian. Ai është Procesi i Berlinit, dhe e shohin si kulmin e përbashkët ku rajoni ynë ulet dhe mund të arrijë sukses.
