“I kam të kursyera falënderimet për ambasadorët”/ Rama njofton skemë financiare për familjet që kujdesen për fëmijët jetimë
Kryeministri Edi Rama, në aktivitetin “Fondi Social 2026”, prezantoi 14 shërbime të reja sociale dhe njoftoi një skemë financiare për të nxitur familjet që të marrin në kujdestari fëmijë jetimë, me mbështetje direkte nga shteti. Ai theksoi se reforma nisi pas shlyerjes së një borxhi të akumuluar prej dhjetëra milionë eurosh ndaj familjeve në nevojë dhe personave me aftësi ndryshe, duke ndërtuar më pas një qasje të re të bazuar në bashkëpunimin me pushtetin vendor.
Sipas Ramës, aktualisht 65 mijë individë përfitojnë nga sistemi i organizuar i shërbimeve sociale, ndërsa fondi për këtë vit është 17% më i lartë se ai i vitit të kaluar. Ai nënvizoi se bashkitë do të kenë rol kyç në identifikimin dhe mbështetjen e familjeve kujdestare, si dhe në përmirësimin e kushteve në institucionet e përkujdesjes, duke përmendur transformimin e jetimores “Zyber Hallulli” në Tiranë.
Në përmbyllje, Rama falënderoi Bashkimin Europian dhe UNICEF për mbështetjen, duke e cilësuar BE-në si modelin më të avancuar të mbështetjes sociale.
