Me kalimin e orëve po bëhen me dije të dhëna të reja nga ngjarja në Kombinat, ku u gjetën pa jetë nënë e bijë, ndërsa vajza tjetër ndodhet në spital. Zhaneta Josifi jetonte me dy vajzat e saj, pasi bashkëshorti i kishte ndërruar jetë. Mësohet se dhe të bijat, Anisa dhe Blerta Josifi, ishin besimtare të një sekti fetar, dëshmitare të Jehovait. Dyshohet se ato e kanë ndërmarrë aktin e rëndë të vetëflijimit, pasi besonin tek ringjallja dhe një jetë më e mirë.
Fatmirësisht se është përmirësuar gjendja e Blerta Josifit. 34-vjeçarja ka dhënë dëshminë e saj gjatë komunikimit me punonjësit e Policisë së Shtetit. Ajo ka treguar shumë shkurt peripecitë që ka kaluar bashkë me të ëmën.
Gazetarja e kronikës Dorjana Bezat, duke iu referuar ekpertëve mjekoligjorë, ka thënë se dyshohet se trupi i Anisa Josifit ishte i dekompozuar, pasi ajo kishte 5 muaj e vdekur.
Për trupin e pajetë kujdesej nëna me vajzën tjetër, duke e lyer me vaj dhe mbështjellë me shtroje.
“Grupi hetimor ka nxjerrë detaje të reja tronditëse në lidhje me ngjarjen e bërë publike mbrëmjen e sotme në zonën e Kombinatit. Dyshohet se 33-vjeçarja dyshohet të ketë ndërruar jetë 5 muaj më parë, dhe mbahej në banese prej 5 muajsh.
Për trupin e saj kujdesej nëna dhe motra. Fqinjët dhe të afërmit e tjerë thonë se kishin muaj pa kontaktuar me vajzën e saj, dhe nëna apo motra tjetër thoshin se ishte në gjumë ose në punë. Policia ka gjetur brenda banesës enë me përbërje të ndryshme dhe me vaj që e përdornin për të lyer trupin e viktimës që të mos dekompozohej.
Këto konstatime u bënë dhe nga ekspertët ligjorë. Për të nxjerrë kohën ekzakte të vdekjes së saj, do duhet edhe një kohë më e gjatë. Në trupin e viktimës janë gjetur shenja vaji që e përdorte nëna me motrën tjetër, për të mos u dekompozuar trupi dhe për të mos ardhur erë të keqe.
Trupi ishte mbështjellë me shtroje dhe mbulesa të shumta. Policisë i ka ardhur në ndihmë dëshmia e Blerta Josifit, e cila është gjetur në jetë dhe ka komunikuar me punonjësit e policisë. Ajo ju ka thënë atyre “ju se keni idenë se çfarë sakrificash kemi bërë ne për të arritur një jetë më të mirë”.
Unë si gazetare e kronikës kam mbuluar raste të tilla, edhe fëmijë të vegjël. Kanë qenë raste që i përkasin këtij sekti, sektit të Jehovait. Në informacionet e fundit, policia ka qenë tre javë më parë në familjen Josifi, sepse kanë pasur informacione se nëna dhe dy vajzat nuk dilnin nga shtëpia. Policia ka marrë kontakte me to, edhe familjarët kanë marrë kontakt me to. Por ato nuk dilnin, flisnin vetëm nga dera dhe nxirrnin justifikim se nuk dilnin nga shtëpia apo nuk shkonin në punë për shkak të koronavirusit”.
