Duket se ‘lufta’ në distancë mes SHBA-së dhe Kinës nuk ka fund. Akuzat e Trump ndaj Kinës vërshojnë çdo ditë, në lidhje me mbajtjen e përgjegjësisë për përhapjen e koronavirusit. Në konferencën e fundit në Shtëpinë e Bardhë, presidenti amerikan Donald Trump shigjetoi Kinën, se ka fshehur të dhënat mbi koronavirusin dhe ka manipuluar me shifrat. Më tej theksoi se Pekini zyrtar dëshiron dhe po punon që ai të humbasë në zgjedhjet presidenciale të 3 nëntorit.
“Unë mund të bëj shumë”, ishte paralajmërimi i Trump, duke vënë në dukje se po shqyrton mundësitë e ndryshme se si të reagojë ndaj Kinës. Por përgjigjja e Pekinit ishte se kjo çështje po politizohet.
Kina është kundër një hetimi ndërkombëtar për pandeminë e koronavirusit, të cilin e konsideron “të politizuar për qëllim për të stigmatizuar Kinën” dhe mbështëtur në “akuza të pabaza” kundër Pekinit. Këtë theksoi Zëvendësministri i Jashtëm kinez, Le Yucheng, gjatë një interviste me transmetuesin amerikan NBC.
“Ky hetim arbitrar bazohet në prezumimin e fajit”, shtoi zv/ministri kinez, “dhe ne e kundërshtojmë me forcë”.
