Gjykata e Apelit në Shkodër ka lënë në fuqi vendimin për dënimin e Safet Bajrit, me 8 vite e 9 muaj e 12 ditë burg, i akuzuar për “Shfrytëzim prostitucioni” dhe “Grup i strukturuar kriminal” në Belgjikë.
Bajri ishte dënuar me 22 vjet burg në Belgjikë për trafikim të qenieve njerëzore dhe shfrytëzim prostitucioni.
Sipas dosjes së mbërritur në Shqipëri nga drejtësia Belge, Safet Bajri është gjetur fajtor për shfrytëzimin si prostitutë të një vajze nga Shkodra me inicialet E.G
Në Shqipëri, ai është i akuzuar si kreu i një grupi kriminal që kryente trafik droge, vrasje dhe trukim ndeshjesh. Bajri u arrestua në shtator të vitit 2018 gjatë një operacioni masiv policor të FNSH-së dhe RENEA-s që çoi në arrestimin e 11 të fortëve, anëtarë të bandës kriminale “Bajri” në Shkodër, në aksionin e koduar “Oaz”. Bajri është duke qëndruar në qelitë e burgut 313 në Tiranë, pasi hetimet ndaj tij po i bën Prokuroria për Krime të Rënda.
