Kryetari i Komisionit të Ligjeve, Ulsi Manja ka dalë në një konferencë për shtyp, duke sjellë reagimin e parë zyrtar të PS-së lidhur me skandalin e publikuar nga gazeta gjermane Bild.
Përgjimet e publikuara nga Bild dëshmojnë blerjen e votave nga Astrit Avdylaj, i cili mes të tjerash, ka biseduar edhe me vetë Dakon, të cilin e quan shpesh “vllai”.
Por, duket se shqetësimi i PS është tjetërkund, teksa Manja gjatë fjalës së tij “i qan hallin” opozitës, për të cilën thotë se po e shfrytëzon këto thashetheme dhe gjysmë të vërteta politikisht, ndërsa shton se opozita duhet të jetë në parlament dhe jo në rrugë.
Manja shprehet se nuk flitet për blerje votash, ndërkohë në njërën nga përgjimet, Avdylaj shprehet se “kafja është e sigurt” teksa kërkon të mos votohet Agron Duka pasi “ne mbështesim PS-në”.
“Lidhur me përgjimet e publikuara, kërkoj hetim për nxjerrje të sekretit hetimor. Kemi thyerje të sekretit hetimor dhe kjo përben vepër penale. Publikime “fake news” për të tërhequr vëmendjen.
Përdorim politik të një dosje shumë të rëndësishme, shumë sensitive nga PD që ka dalë në rrugë dhe duke e kthyer në çështje politike, po na kthen në kohërat më të errëta. Nuk e di nëse ka ndonjë video që nuk ka dalë nga dosja 339, në asnjë nga materialet e dala unë nuk kam parë blerje votash.
Të qetësohet publiku për të pavërtetat që nuk çojnë askund. Ne jemi në një situatë ku vendi ka bërë realisht përparime të dukshme, doli raporti i KE, u dha rekomandim dhe presim një vendimmarrje nga KE. Çështje të tilla siç janë këto të sotmet, siç është dalja në publik e këtyre përgjimeve, nuk e nderojnë aspak imazhin e Shqipërisë ndaj është në nderin e Shqipërisë që t’i japë zgjidhje ligjore dosjes 339, që t’i heqim mundësinë opozitës që ka dalë në rrugë që të mos merren me thashetheme, por opinionit publik t’i serviren të vërtetat siç janë. Opozita e ka bërë kauzë politike të betejës së saj, duke djegur mandatet e duke dalë në rrugë. Nuk mendoj se shqiptarët presin nga opozita se çfarë tha Niçja në materialet e përgjuara, opinioni publik pret një opozitë të përgjegjshme, institucionale. Kësaj opozite i bëjnë përshtypje përgjimet, por mos harroni , kanë dalur përgjime edhe me 200 mijë euro të kërkuara nga hetimet e pazbardhura të shumë dosjeve, janë gati 1 miliard lobime nga opozita. Është ora dhe momenti që prokuroria do të duhet të flasin me gjuhën e të vërtetës, kushdo që është përfshirë në vepra penale, të marrë ndëshkimin sipas ligjit, koha kur bëhet politikë me përgjime dhe gjysmë të vërteta, duhet të marrë fund.”
I pyetur nëse është i shqetësuar për përfshirjen direkte të një figure të rëndësishme si Dako në këto përgjime, Manja tha:
“Nuk jam i shqetësuar për përmbajtjen e përgjimeve, kjo është çështje e drejtësisë, jam i shqetësuar që bërja publike e tyre e ka dëmtuar hetimin.”/ Tirana Today
E PLOTË/ Përgjimet E ZBARDHURA, Bild nxjerr bisedat: Si manipuloi mafia zgjedhjet në Shqipëri
